BUTUAN CITY – Wala na maluwas pa ang kinabuhi sa usa ka grade 11 student sa lungsod sa Sibagat, Agusan del Sur human kini naghikog kagahapon sa Purok 6, Brgy. Anahawan sa maong lungsod.
Sigon ni Police Staff Sgt. Ion Rey Bagtong, pasado alas-5:45 sa buntag dihang pukawon na unta sa iyang lola ang biktimang gitago lang sa pangalang Inday aron mag-andam alang sa ilang pag-eskwela apan nakita niyang nagbitay na kini.
Daling kining gibadbaran sa lola og pisi nga gihikot sa iyang li-og apan wala na ma-revive pa.
Migawas sa ilang imbestigasyon gikan sa mga classmates ni Inday sa Sibagat National High School nga naglisod kini sa ilang mga subjects ilabina sa English nga gikumpirma usab sa lola.
Tungod niini kumbinsido ang pamilya sa biktima nga wala’y foul play sa iyang pagkamatay.
