BUTUAN CITY – Lauman ang mas daghang makasuhan sa umaabot nga mga adlaw human gisugdan ang all out war sa Department of Environment and Natural Resources kon DENR-Caraga batuk sa illegal logging ug illegal mining ning rehiyon.
Sigon ni Eric Gallego, Regional information officer sa DENR-Caraga, gi-consolidate na ang nakuhang resulta sa tulo ka adlaw nga all out war diin daghang nang nabisitahang mga bansuhan, wood processing plant og mga ilegal nga pagmina.
Sumala pa ni Gallego nga laumang madugangan pa ang unang gikataho nga 24 ka bansuhan nga gipasirad-an base sa nakitang kalapasan sa ilang operasyon. Gane gipanganlan pa sa opisyal ang nagkadaiyang bansuhan nga nabisitahan sa koponan dinhe sa Agusan Del Norte ug Agusan Del Sur.
Gawas matud pa sa kasong pagsupak sa PRESIDENTIAL DECREE NO. 705 nga nailang FORESTRY REFORM CODE OF THE PHILIPPINES, kasuhan usab ug Qualified theft ang mga tag-iya sa mga bansuhan nga nasutang walay tukmang papeles o permit.
Pasabot pa ni Gallego nga ang Qualified theft, tungod sa pagpangawat sa mga ilegal loggers sa natural resources.
Gi-andam na matud pa ang tukmang mga dokumento sa pagpasaka og kaso dungan sa pagbarog nga determinado ang buhatan nga ipahamtang kini sa mga responsable.
Gipasabot ni Gallego nga ang nag-unang tumong sa all out war batuk sa mga illegal logging ug illegal mining, nga ma-undang na ang ilegal nga pagpamutol ug kahoy sa kalasangan og pag-guba sa kinaiyahan.
Dili matud pa ma-undang ang maong ilegal nga buhat ugaling duna pay mga bansuhan nga modawat sa mga gipamutol nga kahoy, nga gihimu na sa hataas nga panahon.
Sumala pa sa opisyal nga kinahanglang protektahan ang kinaiyahan ilabina ang nahabiling virgin forest nga muabot sa 89-mil ka hektarya.
Alayon niini, gi-awhag ni Gallego ang katawhan nga kung duna silay nahibal-an sa mga ilegal nga pagpangahoy ug illegal mining, ilabina ang mga nalambigit niini, ipaabot ang maong impormasyon sa buhatan.
Mamahimo kining ipaabot pinaagi sa ilang hot line dayung butyag nga andam mo-responde ang ilang operatiba.
Ang maong all out war gi-apilan sa taga Department of Justice, NBI, CIDG, kapulisan ug kasundaluhan.
