BUTUAN CITY – Nakasinati usab ang pagdugok sa mga langaw ang mga residente sa Purok 3, Barangay Sumilihon ning dakbayan sa Butuan sama sa Purok 5, Brgy Los Angeles.
Hangyo ni Ecila Formentera, residente sa nasangpit sa barangay ngadto sa farm manager sa maong poultry farm nga ma-minimize na nila ang mga langaw atol sa ilang pag-harvest.
Dugang pa ni Formentera, bisan pa man nga anaa gihapoy mga langaw sa kasamtangan, apan dili na kini ingon kadaghan ug kagrabe sama sa na-agian nila sa miaging panahon, diin ang mga langaw naghatag og dako nga disturbo, labina sa mga pagkaon.
Gihangyo usab niya nga makontrolar na sa mga tagdumala ang pagdagsa sa langaw aron malikayan ang mga reklamo sa umalabot nga mga harvest.
Samtang gipadayag usab ni Friendship Anino, residente sa susamang dapit nga susamang problema ang nasinatian nila sa iyang pamilya ilabina nga mas nanaghan ang mga langaw dihang nag-full harvest na sa ilang mga manok ang poultry farm sa ilang lugar.
Bisan matud pa og gitagaan sila og powder nga pangpatay sa mga langaw apan dili gihapon kini mangawala tungod kay padayon man gihapon silang gidagsa sa mga niini.
