BUTUAN CITY – Kadaghanan sa mga boarders wala’y dalang gamit ug tapot-lawas lang nga mihawa sa ilang tagsa-tagsa ka mga boarding houses tungod sa kakurat dihang nadunggan na ang syagit nga duna’y sunog rason sa iyahay nila og timbakwas,
Sigon ni Shirley Jane Namuwag, residente sa Las Nieves, Agusan del Norte ug graduating na sa Caraga State Univeristy kon CSU, pila lang ka gamit ang iyang nabitbit human nakita sa iyang pagbakod ang dako na nga kalayo rason nga gi-una niya ang paggawas.
Ang uban matud pa niyang mga boardmates wala’y nadala ug sama sa uban, wala usab niya nadala ang iyang mga importanteng papeles, name plate ug uban pa. Wala matud pa’y angayang kabalak-an tungod kay nakagawas man silang tanang mga boarders.
Samtang gibutyag usab ni Pierre Villa, tag-iya og boarding house na na-apil pagkasunog, hapit pa sila wala makagawas sa ilang gipuy-an tungod sa kadako na sa sunog. Mi-abot na lang usab sa 10 ang iyang mga boarders human kini gipasira sa lokal nga kagamhanan sa siyudad.
