BUTUAN CITY – Ubay-ubay nga mga locally made products sa nagkada-iyang lalawigan ning rehiyon sa Caraga ang gipang-display karon sa may Gaisano mall ning siyudad sa Butuan subay sa gipahigayong upat ka adlaw nga Agribusiness Support for Promotion and Investment in Regional Exposition kon ASPIRE Caraga 2025 nga mulungtad hangtud sa Agusto 31.
Usa kini ka flagship initiative sa Department of Agriculture (DA)-Caraga, uban sa pakig-alayon sa Department of Trade and Industry (DTI) ug sa Philippine Chamber of Commerce and Industry (PCCI).
Labaw pa kini sa trade fair tungod kay convergence kini sa mga government and private sectors nga nagtinguhang i-empower ang mga local agripreneurs ingon man mga micro, small, and medium enterprises (MSMEs) sa Caraga Region.
Sigon ni Aurell Arais, public relations officer sa DA-Caraga, gibana-banang usa ka gatus ka kahugpungan sa mga mag-uuma ug mananagat nga nakamugna og produkto nga gi-collate sa mga hingtungdang local government units ug gi-display sa 24 nila ka mga booths.
Samtang gibutyag usab ni Gilbert Anguay, Provincial Agro-Business coordinator sa Dinagat Islands province, mibiya sila sa ilang lalawigan niadto pang Martes aron masiguro nga makatabok sila tungod sa nagtunhay nga low pressure area.
Mi-abot sa 50 ka klase sa mga produkto ang ilang gidala ning siyudad sa ingon makita ug masulayan sa katawhan ang ilang mga produkto gikan sa mga local processors sa pito nila ka mga lungsod.
Niini nga kalihukan, ang mga partisipante nakigkutay sa mga potential buyers, mga investors, ug mga ka-ubanang entrepreneurs.
