BUTUAN CITY – All set na si Boxing Legend ug people’s Champ Manny Pacquiao alang sa away niini karong buntaga, batok sa Mexican-American Boxer nga si Mario Barrios.
Sumala sa pamahayag sa ni Manny atul sa weigh in nila tali sa iyahang kaatbang kagahapong adlawa, malipayon siyang makabalik na usab kini sa boxing ring human sa upat ka tuig nga pahulay.
Dugang niini, passion matud pa niya ang boksing rason nga nibalik gayud kini. Sumala niini nga dako ang iyahang pasalamat sa Ginoo tungod kay hangtud karon, gihatagan gihapon siya og kusog ug maayong panglawas.
Sayrang karong adlawa, makigtigi ang 46 anyos nga boksidor sa 30 anyos nga si Barrios alang sa WBC welterweight title sa MGM Grand Garden Arena, Las Vegas. Sayrang si Pacquiao, dunay kinatibuk-ang 62 ka daug sa 73 ka dula, 39 niini ang daug via knockout, duha ang dra, ug walo ang pildi.
Samtang, kalabanon niini ang batan-ong si Barrios nga nagtagag sa record nga 32 ka-away, 29 ka daug, 18 niini ang via knockout, usa ang draw ug duha ka pildi. Kagahapong adlawa, parehong sulod sa welterweight limit nga 147-pounds ang duha ka boksidor, diin si Pacquiao, mitimbang og 146.8-pounds samtang si Barrios, mitimbang og 146.2-pounds kondiin mas bug-at ang timbang ni Pacquiao sukad sa iyang ika-upat nga pakig-atubang kang Juan Manuel Marquez niadtong Disyembre 2012.
Katapusang nakig-away si Pacquiao niadtong tuig 2021 diin napildi siya ni Yordenis Ugas pinaagi sa unanimous decision. Samtang ang 30-anyos nga si Barrios, kataposang nakig-away niadtong Nobyembre sa miaging tuig pinaagi sa 12-round split draw batok kang Abel Ramos.
