BUTUAN CITY – Nagrali ang mga magtutungha gikan sa nagkalain-laing programa ug year level sa Caraga State University kon CSU main campus kagahapon aron ipasibaw ang ilang kadismaya sa kawala’y lig-ong aksyon sa gobyerno batuk sa lapad nga kurapsyon gamit ang bilyunes pisos nga pundo sa mga flood control porjects.
Lahi ang maong protesta tungod kay nasabutan lang kini ning mi-aging gabie pinaagi sa usa ka post sa social media group apan wala’y opisyal nga organizer. Lakip sa gipanawagan sa mga nagprotesta nga ipapriso ang mga kurakot sa kaban sa katawhan. Nanghinaut si alyas Jay, nga dili magpakabuta-bungol ang kabataan sa nagakahitabo karon sa nasod ug mumugna og kaugalingong opinyon nga wala’y impluwensya sa ubang tawo.
Panawagan usab niini nga kinahanglang dunay mapriso ug manubag sa lapad nga kurapsyon sa Pilipinas, aron makuntento ang mga Pilipino sa serbisyo sa gobyerno. Apela pa niini, dili lang sila i-red tag tungod kay dili man sila anti-government, kundili batuk lang sila sa mga tawo sa gobyerno nga kurakot.
Samtang gipadayag usab ni alyas Grey, nga ila lamang gigamit ang prebilihiyo nga maka-eskwela sa pagpakuyanap kung unsa na ang nagapanghitabo karon sa Pilipinas dayong panawagan nga undangon na ang na-andang political crayon.
