BUTUAN CITY – Malipayon nga gipa-ambit ni Robert Jan Fabria Pasok, magtutungha sa Caraga State University ug nakatapos sa kursong Bachelor of Secondary Education major in Science, ang iyang pagpasar sa Licensure Examination for Professional Teachers.
Sumala pa niini, sukad pa sa high school, gi-angkon ni Pasok nga nahingangha na siya sa siyensya tungod kay kini naghatag og tubag sa daghang mga pangutana sa kinabuhi sama sa pagdagan sa sakyanan ug nganong kinahanglan kini og gasolina.
Tungod sa iyang kadasig ug inspirasyon gikan sa pamilya ug mga silinganang magtutudlo, misulod kini sa kursong edukasyon aron mahimong maestro.
Dugang pa ni Robert, bisan pa sa mga hagit pinansyal sa pag-eskwela ilabina sa pag-review alang sa board exam, nagpadayon kini pagpaningkamot uban sa pagsalig sa Ginoo, hangtud nga nakab-ot niya ang iyang dugay nang gidamgo nga mahimong usa ka Licensed Professional Teacher kon LPT.
