BUTUAN CITY – Nag-viral karon ang bitbit nga leather bag ni Senadora Imee Marcos atol sa hearing kalabot sa anumalusong mga flood control projects tungod kay porma kini og buaya.
Kini subay na sa unang regular session karon sa Senado ubos sa 20th Congress kondiin ang maong anumaliya ug garapalan nga kurapsyon ang gihisgutan sa mga Senador.
Bisan wala’y opisyal nga pamahayag ang senador kalabot niini, apan gikuninitan na kini sa daghang mga netizens nga nagkomento online — ilabina nga ang hearing, kalabot man sa korapsyon sa mga flood control projects.
Tungod niini daghan ang nangutana kung symbolic lang ba kini o coincidence o gituyo gyod sa senadora.
Ang maong eksena nahimong klik sa pipila tungod kay bisan sa fashion dili gihapon magpa-ulahi sa trending ang senadora nga kusog mangulit sa mga opisyal sa gobyernong gustong iduot ang mga Duterte samtang alang sa uban, simpleng coincidence lang kini nga dili na angayang padak-on.
