BUTUAN CITY – Mas gipahugtan pa sa Regional Inter-Agency Task Force kon RTF CoVID-19 One Caraga Shield ang pagbantay sa tibuok rehiyon human nga kini na lang ang bugtong rehiyon sa tibuok nasud nga wala’y kaso sa COVID-19.
Kini tungod sa padayong pagkunhod pa sa ihap sa mga ‘Patients Under Unvestigation’ kon PUIs ug ‘Persons Under Investigation’ kon PUMs sa tibuok rehiyon human nga mi-abot na lang sa napulo kagahapong adlawa ang mga PUIs, base sa COVID-19 Situational Report No. 48 sa Department of Health-Center for Health and Development kon DOH-CHD Caraga.
Sa maong ihap, duha ang nagpabilin pa sa ospital samtang pito ang naka-home quarantine ug usa ang namatay tungod sa gihambing chronic kidney disease kansang test result, padayon pang gipa-abot.
Base sa ilang PUI tracker, pito sa mga niini ania sa Butuan samtang tag-usa sa Agusan del Norte, Surigao City ug Surigao del Sur ug wala na sa Surigao del Norte.
Samtang sa mga ‘Persons Under Mionitoring’ kon PUMs usab, mi-abot na lang sa 690 ang padayong gi-monitor human nga sa kinatibuk-ang ihap nga 7,713 mi-abot na sa 7,023 ang nakarekober.
Aron masigurong dili makasulod sa rehiyon ang gikahadlukang Coronavirus, nag-iyahay na pagpatuman og preventive measures ang mga local government units.
