BUTUAN CITY – Alarming na ang sitwasyon sa COVID-19 sa Caraga Region ilabina ning dakbayan sa Butuan, sumala ni Department of Health Caraga Regional Director Jose Llacuna Jr sa pakighinabi sa Bombo Radyo Butuan.
Base sa datos sa DOH-Caraga, dunay nadugang nga 40 ka positibong kaso sa COVID-19 kagabii ug 29 niini gikan ning syudad kondiin ang kinatibuk-ang ihap, anaa na sa 589 samtang 367 na ang hingpit nang nakarekober samtang 148 ang mga local transmission.
Gikabalaka sa opisyal ang paspas nga pagsaka sa local transmission ning dakbayan rason nga anaa na karon sa second generation ang contact tracing sa Butuan sa mga natakdan sa COVID 19.
Mala-umon kining hingpit nang maproseso sa bag-ong laboratory ang pag swab tests aron masayran gilayon kung kinsa kadtong angay nga i-quarantine ug hatagan og special concern sa Barangay Health Emergency Response Teams kon BHERTs.
Nanghinaut pa si Dr. LLacuna nga unta duna’y daghan pang mga beds sa quarantine facility nga mabutang aron ang mga contacts sa nagpositibo sa COVID mahimong ibutang niini aron direktang ma-obserbahan kung walay igong kapasidad sa required nga quarantine facility.
Pahimango ni RD Llacuna, dakung hagit kung mosangpot pa sa third generation ang contact tracing rason nga gikinahanglan ang kooperasyon sa tanan aron makalikay sa makamatay nga virus
