BUTUAN CITY- Anaa na sa downtrend kon pa-ubos na ang mga kaso sa COVID-19 sa probinsya sa Surigao del Sur.
Kini ang gikumpirma ni Dr. Eric Montesclaros, Provincial Health Officer sa lalawigan human na-monitor ang ubos nga ihap nga natalang magpa-swab sa nakalabay nga mga adlaw.
Sumala ni Dr. Montesclaros subay sa ilang monitoring sa nakalabay nga mga adlaw, makita na ang paubos nga positivity rate sa mga swab samples nga gipa-ilalom sa confirmatory testing sa nasangpit nga sakit. Tungod niini, miubos usab ang Average Daily Attack Rate ( ADAR ) niini sa tibuok lalawigan.
Sumala pa, usa sa rason niini mao ang padaghan sa ihap sa mga nabakunahan sa COVID-19 Vaccines sa tibuok probinsya.
Sigon ni Dr. Montesclaros, anaa sa 21% na sa ilang target population ang fully-vaccinated na sa nagpadayon nga vaccination rollout sa tibuok lalawigan.
Dugang pa niini, nakatabang usab ang padayong pag-abot sa mga dugang suplay sa bakuna alang sa probinsya.
Subay niini, subling nagpahimangno ang opisyal ngadto sa publiko nga dili gihapon magkumpyansa tungod kay posibleng temporaryo lamang ang nimaayong kahimtang sa ilang mga COVID-19 cases.
