BUTUAN CITY – Nadugangan na usab og 10 ka mga bag-ong kaso sa COVID-19 ang Caraga Region base sa virtual report sa Department of Health-Center for Health and Development kon DOH-CHD Caraga kaganina.
Kini na-apod sa tag-usa ka kaso sa Buenavista, Agusan del Norte ug Bayugan City sa Agusan del Sur, 3 sa Surigao City samtang 5 usab dinhi sa dakbayan sa Butuan.
Sa maong ihap. 70-porsiento ang anaa sa edad nga 31 ngadto sa 60-anyos samtang 60-porsiento kanila ang mga lalaki ug 40-porsiento ang mga babaye.
Ang mang gidaghanon, gi-classify sa usa ka frontliner ug 9 ka mga local transmission nga naglangkob sa 4 ka mga bag-ong local transmission cases, 3 ang duna’y close contact sa mga kanhi kumpirmadong COVID-19 cases ug tag-usa ka healtcare worker ug frontliner kondiin duha kanila ang wala’y mga simtomas kon asymptomatic ug ang walo duna’y mga mild symptoms.
Dinhi sa Butuan, ang lima ka mga kaso na-apod sa tagduha ka kaso sa Brgy. Bonbon ug San Vicente samtang usa usab sa Brgy. Villa Kananga.
Tungod niini, ang entiro Caraga Region duna na’y 1,235 ka mga cumulative confirmed COVID-19 cases kondiin 701 na ang nakarekober, 495 ang mga aktibong kaso ug 39 na ang patay human nadugang sa listahan kagahapon ang 70-anyos nga babayeng taga-Butuan City kinsa nakasinati og pag-ubo ug hamubo lang nga gininhawa niadtong Septembre 20 rason nga gi-admit gilayon pagka-ugma apan namatay niadtong Septembre 5.
Ang kinatibuk-ang kaso sa COVID-19 sa Caraga Region na-apod ngadto sa mga lalawigan sa Agusan del Norte – 128; Agusan del Sur -80; Surigao del Norte – 86; Surigao del Sur-55 ug 11 sa Dinagat Islands.
Samtang sa mga siyudad, 15 sa Bayugan City sa Agusan del Sur; 23 sa Surigao City; 26 sa Cabadbaran City sa Agusan del Norte; 28 sa Tandag City ug 104 sa Bislig City pulos sakop sa Surigao del Sur ug pinakadaghan ang sa Butuan City nga mi-abot sa 679.
JEN –
