BUTUAN CITY – Wala gihatag sa pinaka unang corgi police dog sa China ang year-end bonus niini tungod sa iyahang pagka “bad dog”, human nga kanunay lamang kining matulog sa trabaho, ug mangihi pa sa iyahang kaugalingong plato.
Naila ang maong iro nga si Fu Zai, kansa una nang ning sikat sa internet tungod sa ka inosente sa mga mata niini ug kahimos sa mga mugbong tiil.
Gi-training si Zai niadtung Enero 2024 isip reserve explosives-detection operative, subay niini, gipasidunggan kini sa mga kapulisan ning nakalabayng semana tungod sa gihimo niining pagpaningkamot arun makapasar sa Level 4 assessment ug daghang mga security tasks, diin gipresentar kaniya sa lamisa ang buwak, mga dulaan, ingon man lamiang snacks.
Apan naputol ang kalipay sa iro dihang gikuha ra sa police officer ang mga dulaan ug pagkaon nga bonus untana niini tungod matud pa sa iyahang ka sipat, ug gisermonan pa hinoon nga untana sa sunod, di na mag pinol-pol sa trabaho.
Tungod niini, nag higwaos ang ginhawa sa mga netizens, ug ang uban, nagbahad pa nga padalhan nila og sinakong snacks ug dulaan ang iro kung dili ibalik sa opisyal ang bonus niini.
