BUTUAN CITY – La-umang mahuman na ang tanang mga coordination meeting nga himoon sa 86 ka mga barangay ning siyudad sa Butuan karong bulana aron mapa-abot na ngadto sa lokal nga kagamhanan ang mga nag-unang problema og mulo sa matag-barangay.
Sa eksklusibong pakighinabi ning sibyahan, gipadayag sa Barangay Kapitan Gemma Tabada sa Barangay Baan km-3 og federation president sa Liga ng mga Barangay sa Butuan City, unang higayon silang mihimo og face-to-face coordination meeting sa tanang barangay aron mapaabot ang nag-unang isyu nga gusto nilang solbaron.
Gipasubmite sila og 5 ka mga isyu, problema o programa nga gusto nilang hatagan og pagtagad kondiin mas gipalambo pa kini kumpara sa nakalabay nga pasubmiton lang og papel ang matag barangay nga maoy basehan sa ihatag nga mga proyekto.
Tungod kay dili man ma-usa-usa ang tanang 86 ka barangay, giklaro ni Tabada nga dunay clustering nga gihimo diin gibahin sa 4 ka cluster ang tanang 86 ka barangay.
Ang unang cluster mao ang mga urban barangay o kining anaa sa sentrong bahin sa siyudad, ang ikaduha mao ang urban barangay o ang mga barangay nga anaa gawas sa sentro sa siyudad apan kusog ang paglambo lakip na niini ang Ampayon, Baan Km 3, og Libertad. Samtang ang ikatulo og ika-upat mao ang mga lagyong barangay nga gibahin sa duha ka grupo.
Sa nakalabay nga mga adlaw, hingpit nang natapos ang coordination meeting sa mga cluster heads, og sunod semana mao na sa level sa department heads nga laumang sundan sa lebel sa mayor nga si Mayor Law Fortun.
