BUTUAN CITY – Gipasakaan og kasong libel sa mga vloggers si Surigao del Norte Rep. Robert Ace Barbers didto sa Quezon City prosecutor’s office kagahapon human niini gihangyo ang National Bureau of Investigation (NBI) nga imbestigahan sila tungod sa ila matud pang koneksyon ngadto sa mga illegal drugs ug sa Philippine Offshore Gaming Operators kon POGOs.
Sigon ni Trixie Cruz-Angeles, usa sa mga reklamante, ang mga akusasyon ni Barbers, wala magpatulog kanila sulod na sa pipila ka gabii ug naghatag usab og kahadlok ngadto sa ilang pamilya.
Pipila matud pa sa ilang mga social media accounts, duna na’y kita apan delikadong matangtang tungod sa mga alegasyon sa kongresista ug sa gipakatag niining fake news.
Una nang nagpadala si Barbers og sulat nga naghangyo sa NBI nga imbestigahan ang gi-alegahan niyang mga narco-vloggers nga duna matud pa’y kutay ngadto sa mga POGOs.
Nasayrang gusto usab ni Barbers, kinsa chairman sa House Committee on Dangerous Drugs, nga susihon sa NBI ang mga kalihukan sa mga vloggers aron masuta ang ilang kutay sa mga POGOs.
Apil sa uban pang mga complainants mao sila Lorraine Badoy, Krizette Chu, Cathy Binag, Joie De Vivre, MJ Quiambao Reyes ug Mark Anthony Lopez.
