BUTUAN CITY – Gi-mobilize na sa mga personahe sa DENR-Caraga ang pagpadala og tabang ngadto sa ilang mga kaubanan ug katawhang na-apektuhan sa bagyong Odette.
Sa eksklusibong pakighinabi ning sibyahan kang DENR-Caraga Regional Executive Director Nonito Tamayo, gibutyag niini nga dunay 3 ka opisina sa DENR sa Surigao del Norte ang totally damage kondiin apil niini ang anaa sa Siargao Island ug sa Dinagat Islands province.
Giklaro usab niini nga taliwala pa man sa mga damyos sa ilang opisina, mapasalamaton gihapon sila tungod kay walay personahe nila nga gikatahong namatay o samaron tungod kang bagyong Odette.
Plano karon sa ilang buhatan nga magpadala og mga relief goods ngadto sa mga naapektuhan sa bagyo.
Gawas pa kini sa ilang pagpadala og mga confiscated lumber ug logs aron makatabang sa lokal nga kagamhanan sa ilang re-construction rason nga gilayong gipa-account niini ang tanang confiscated products sa tibook Caraga Region aron ipadala na sa mga lalawigan sa Dinagat Islands ug Surigao del Norte.
Mukabat sa 90,000 board feet nga mga kahoy ang ilang ipadala sunod adlaw ngadto sa naasoy nga mga lugar.
