BUTUAN CITY – Mu-abot sa 12 ka mga sesyon ang gitakda sa International Criminal Court kon ICC sunod semana alang sa confirmation of charges hearing kang kanhi Pangulong Rodrigo Duterte sa kasong crimes against humanity.
Ang hearing molungtad og upat ka adlaw gikan sa Pebrero 23 ug 24 ingon man Pebrero 26 ug 27. Sa matag adlaw, adunay tulo ka sesyon kondiin ang unang sesyon himuon sa Pebrero 23 gikan sa alas-5 hangtod alas-6 sa hapon (oras sa Pilipinas).
Sundan kini sa alas-6:30 hangtod alas-7:30 sa hapon. Samtang ang ikatulo ug katapusan nga sesyon himuon sa alas-9 hangtod alas-10 sa hapon.
Susamang schedule ang sundon sa laing tulo ka adlaw sa hearing.
Sa confirmation of charges hearing, susihon sa ICC kung adunay igo nga ebidensiya batok sa kanhi presidente sa kaso nga crimes against humanity.
Dinhi ipresenta sa Prosecution, Defence, ug Legal Representatives of Victims ang ilang mga oral submissions sa mga huwes sa ICC aron depensahan ang ilang argumento.
Ang hearing nga orihinal nga gitakda sa Septyembre 23 nasibog tungod sa daghang petisyon nga gisubmite sa kampo sa kanhi presidente.
