BUTUAN CITY – Gipadayag ni kanhi Senate President Franklin Drilon nga kinahanglan nga usa ra ka kandidato ang ipagawas sa oposisyon aron adunay tsansa nga mudaog batok kang Vice President Sara Duterte sa 2028 presidential election.
Gipadayag niya kini human sa usa ka private lunch ka-uban ang mga lider sa Liberal Party ug Akbayan.
Sumala ni Drilon, kinahanglang mupili og usa lang ka kandidato sa oposisyon pinaagi sa masabutang proseso aron duna’y dakong tsansa nga mudaog batuk sa Bise Presidente.
Apan aminado usab kini nga lisod ang pagpili kay wala pa’y klaro ang mekanismo ug wala pa sila’y konkretong plano kung unsaon kini.
Bisan pa man niini, gibutyag ni Drilon nga kinahanglan mapili ang kandidato sa dili pa matapos ang 2026 aron adunay igo nga panahon sa kampanya ug pagpanguha og pondo.
Sa pagkakaron, wala pa’y napili nga kandidato ang oposisyon, samtang si VP Sara Duterte una nang nagpahibalo nga plano niyang mudagan sa 2028, human siya gitambagan sa iyang amahan nga si kanhi Pangulong Rodrigo Duterte.
