BUTUAN CITY – Naglusad na og massive information drive ang mga election offices sa Commission on Elections kon COMELEC-Agusan del Norte karong anaa na lang sa upat ka mga adlaw ang pa-abuton, tak-upan na ang voter’s registration sa Septembre 30.
Sa eksklusibong pakighinabi ning sibyahan, gibutyag ni provincial election supervisor April Joy Balano nga tungod kay nagkapupos na ang adlaw sa rehistrasyon, giwala na nila ang satellite registration tungod kay ang tanang mga lungsod, nakatutok na diha sa ilang municipal offices gawas lang sa COMELEC-Butuan nga nagpadayon ang rehistrasyon sa SM City.
Sa pagkutlo niini nga balita, gibutyag Atty. Balano nga hinay ang turn-out sa ilang rehistrasyon ug posibleng tungod kini sa mas gipakusgan nila kaniadto nga satellite registration sa kabaranggayan. Gani sa target nilang mga bag-ong registrants, dili dako ang gisaka sukwahi sa mi-aging mga eleksyon.
Subo nga gipahibalo ni Atty. Balano nga gikan sa kapin 509-mil ka mga registrants ning mi-aging eleksyon sa entiro lalawigan apil na sa Butuan City, mikunhod kini karon sa 480-mil tungod sa kadaghan usab sa na-deactivate nga mga registered voters human wala makabotar sa nakalabay nga duha ka eleksyon. Giklaro usab sa opisyal nga wala na’y extension sa voter’s registration base na sa hugot nga kamanduan usab ni COMELEC chairman George Erwin Garcia.
