BUTUAN CITY – Mipirma na ang Commission on Elections kon COMELEC sa usa ka joint venture tali sa SMS Global Technologies Inc. ug sa Sequent Tech Inc. alang sa pinaka-unang online voting and counting system kon OVCS nga alang lamang sa mga Filipino overseas voters.
Ang joint venture maoy duna’y pinaka-ubos nga bid alang sa pagkuha og OVCS gikan sa upat ka mga bidders alang sa 2025 midterm elections.
Sigon sa poll body, mukabat lang sa P112 milyones ang ilang bid, kansa mas ubos sa gitaganang pundo nga P465.8 milyon alang sa OVCS procurement.
Giklaro usab ni COMELEC Chairman George Erwin Garcia nga madani sa online voting ang mas daghang Pilipino aron ma-exercise ang ilang katungod sa pagbotar.
Sa pagkakaron, daghan pang mga overseas Filipino workers kon OFWs ang wala pa makaparehistro alang sa umalabot nga eleksyon tungod kay layo ang embahada sa Pilipinas gikan sa ilang gipuy-an o kaha gitrabahuan.
Human sa contract signing, gipakita sa Chief Technology Officer sa Sequent Tech Inc. nga si Eduardo Robles ang paagi sa pagbotar sa mga overseas Filipino gamit ang portal.
