BUTUAN CITY – Gitun-an na karon ni Commission on Elections kon COMELEC Chairman George Garcia ang pagpasaka og kaso batuk sa mga tawong nagpataka lang og labog og akusasyon aron dauton ang ilang trabaho ug kredibilidad ilabina ang pasangil nga midawat siya og suhol gikan sa Miru Systems, ang technology provider sa May 2025 midterm elections.
Gibutyag sa opisyal nga fake news ang gipasi-atab sa maong mga indibidwal ilabina ni kanhi Caloocan representative Edgar Erice kalabot sa gitawag niining ‘Bahamas files’ kondiin nakadawat matud pa og $15 million ang usa ka COMELEC official gikan sa Miru Systems nga nakabase sa South Korea.
Ang maong kantidad, gideposito matud pa sa 14 ka mga bank accounts sa Bahamas bugti sa pagtugot nga ang maong South Korean company na ang gamiton sa eleksyon.
Gibarugan usab niyang dili siya mukanaog sa puwesto tungod lang sa nanggawas nga mga pekeng balita dayong saad nga ipadayon nila ang pagpangandam alang sa umalabot nga eleksyon aron dili mulampos ang mga duna’y dautang plano nga bungkagon ang ilang imahe.
