BUTUAN CITY – Dili palabyon sa Commission on Elections kon COMELEC-Caraga ang online post sa usa ka media entity sa Surigao del Sur nga nag-akusang gitago matud pa sa balay sa usa ka re-electionist congressman ang mga Automated Counting Machines o ACMs nga gamiton sa maong lalawigan karong eleksyon.
Kini human nila nakumpirma sa gihimong verification ang na-post nga picture ug dihang na-enlarged, dinhi nasayran nga una na kining na-post sa usa ka media outlet sa Cebu City tungod sa markings nga dili alang sa Caraga Region.
Sa eksklusibong interview sa Bombo Radyo Butuan, gipadayag ni COMELEC Caraga assistant regional director Atty Geraldine Samson, na dinhi na usab nila nasayran nga ang box nga gitumbok sa pekeng online post, wala’y sulod nga mga ACMs kondili mga star links lang nga nakatakdang i-install sa mga voting centers alang sa transmission purposes karong eleksyon.
Sa pagkakaron, nakig-alayon na sila sa Anti-Cybercrime Unit sa Police Regional Office-13 aron makamugna og legal nga lakang ug masampulan ang nag-post sa fake news tungod kay mahimo matud pang kwestyon kini sa integrity sa election result kung dili nila aksyunan.
Gidugang pa ni Atty. Samson nga ilang i-establisar ang tanang authentic nga mga detalye apil na ang responsableng indibidwal nga nag-post sa fake news aron siguradong mapanubag kini.
Pursigido silang magtakda og ehemplo ngadto sa publiko aron maputol na ang pagpataka og post og mga sayop nga impormasyon diha sa social media dayong paniguro ngadto sa tanan nga wala’y angayang kabalak-an ang publiko sa umalabot nga eleksyon.
