BUTUAN CITY – Andam na ang Commission on Elections kon COMELEC -Agusan del Norte alang sa pormal nang pagsugod sa election period karong Dominggo, Enero 12 kansa simultaneous nga himuon sa entiro nasud.
Sigon ni provincial election supervisor Atty. April Joy Balano, sa maong adlaw pasado alas-otso sa buntag, duna’y himuong kick-off ceremony kondiin mao usab kini ang pagsugod sa gun ban ka-uban ang tanan nilang mga stakeholders aron usab pormal nang imontar ang mga COMELEC checkpoints.
Giklaro ni Balano nga ang kapulisan mismo ang mag-man sa checkpoints kinsa gibansay na aron masiguro nga ilang ma-check ang tanang mu-agi nga mga sakyanan bisan og in plain view lang himuong inspeksyon.
Mahimo matud pang magpa-exempt ang uban apan duna’y guidelines nga sundon tungod kay dili matud pa kini basta-bastang ihatag kondiin nagsugod ang pagdawat og aplikasyon sa exemption niadtong Nobyembre ning mi-aging tuig.
Giklaro pa niini nga online ang application ug direkta na kining i-file sa ilang sentrong buhatan rason nga wala sila’y hold kung kinsa ang mga indibidwal nga nahatagan og exemption.
