BUTUAN CITY – Ipatuman na sugod karong adlawa ang istriktong color coding scheme alang sa mga quarantine pass dinhi Butuan City, base na kini sa Executive Order No.24 nga gipakanaog ni Mayor Ronnie Vicente Lagnada ubos sa nagtunhay nga Enhanced Community Quarantine.
Tumong niini nga malimitahan ang paggawas sa mga tawo sa ilang panimalay aron batukan ang pagkaylap sa coronavirus disease kon covid-19. Ang quarantine pass magamit lamang aron makasulod sa mga palitanan sa ingon makapalit og mga essestial goods kon mga nag-unang kinahanglanon sa panimalay sama sa pagkaon, tambal ug uban pa.
Gibahin sa tulo ang maong color coding scheme , diin ang itom nga pirma sa kapitan magamit lamang sa matag adlaw nga Lunes ug Huwebes, samtang ang color blue sa adlaw’ng Martes ug Biernes ug magamit lamang sa adlaw nga Mierkules ug Sabado ang mga quarantine pass nga dunay puwa nga pirma.
Sa pakighinabi sa Bombo Radyo Butuan kang PLt. Abel Bulawan, information officer sa Butuan City Police Office, malaumon siya nga nakasabot ug musunod na ang tanang Butuanon sa bag-ong patakaran.
Sumala sa opisyal nakasabot siya nga duna pa’y masipyat sa unang adlaw sa pagpatuman niini dungan sa pagklaro nga dili mamahimong gamiton ang home quarantine pass sa pagsuroy-suroy kundi sa mga importanteng lakaw lamang.
Duna matud pa’y naghulat nga silot ug penalty sa tanang ididibwal nga mapatud-ang nakalapas sa bag-ong patakaran.
Gipasidad-an usab sa opisyal ang mga ginikanan nga siguradhong mahipos ang ilang mga menor de-edad nga anak tungod kung masakapan ang mga niini nga galatagaw ilabina sa panahon sa curfew hours, ginikanan ang imbitaron sa police station aron mahatagan og tukmang silot.
