Colegio de Liga ng mga Barangay, subling mag-operate sa Hunyo 2018

BUTUAN CITY – Gipa-abot na lang sa Liga ng mga Barangay ang ipagawas nga executive order ni Pangulong Rodrigo Duterte alang sa subling pag-operate sa Colegio de Liga ng mga Barangay ning siyudad sa Butuan.
Sa eksklusibong pakighinabi sa Bombo Radyo Butuan, gibutyag ni Association of Barangay Captains kon ABC Butuan City Federation President og Banza Brgy. Captain Nestor Amora, nga gi-endorso na sila sa Regional Liga ngadto kang Pangulong Rodrigo Duterte.
Kini isip suporta usab sa mga barangay kapitan sa tibuok Caraga Region ngadto sa tinguha ni Pangulong Duterte nga mahatagan og libreng edukasyon ang mga batan-ong gustong makatapos sa ilang pagtuon pinaagi sa nasulayan na nga tunghaan.
Gidugang pa ni Kapitan Amora nga komitido ang mga barangay kapitan ning rehiyon alang sa paghatag og libreng edukasyon.
Nagkasabot matud pa ang maong mga barangay kapitan nga pag-abot sa Hunyo sunod tuig, higayong mapagawas na ang gipangayo nilang executive order, makapadala na sila og daghang mga estudyanteng makatungha nga libre uban sa ilang paningkamot nga mulambo kini.
Bugtong ma-abag lang matud pa sa mamahimo nilang mga estudyante mao ang pagdonar nila o kaha sa ilang ginikanan o ba kaha guardian og usa ka bag nga dugo matag-semestre.
Ang maong mga stocks unya sa dugo, mahatag ngadto sa mga manginahanglang Caraganons kansa dakong tabang na unya ilabina panahon sa emerhensya kondiin nihit ang supply niini. (Beth Ruiz)