BUTUAN CITY – Nakigkita si Canadian Prime Minister Mark Carney kang Chinese leader Xi Jinping sa Beijing alang sa tinguhang makakab-ot og usa ka trade deal.
Ang pagbisita ni Carney natigayon human ang halos usa ka dekada nga namantsahang relasyon tali sa duha ka nasud.
Sigon ni President Xi, duna’y pagtu-is sa relasyon tali sa China ug Canada sukad nagkahimamat ang duha ka lider sa usa ka summit niadtong Nobyembre ning mi-aging tuig.
Gihulagway usab sa mga opisyal ang maong pagbisita isip consequential ug makasaysayanon – usa ka mahinungdanong lakang human nga ang Canada-China relations nabugnaw niadtong 2018, dihang gi-aresto ang usa ka taas nga Huawei official.
Mi-abot si Carney sa China kagahapon ug nakigtagbo kang Chinese Premier Li Qiang ug ang iyang pagbisita sa maong nasud, usa ka higayon alang sa Ottawa aron mabalik ang ilang relasyon ug makapangita og bag-ong economic opportunities isip kabahin sa ialng mga paningkamot nga makunhuran ang ilang pagsalig ngadto sa Estados Unidos kansa mao ang ilang pinakadakong customer.
