BUTUAN CITY – Nagsuspende usab og klase ang dakbayan sa Butuan niining buntaga bisan pa wala pa kini gipa-ilalom sa wind signal number 1 tungod sa bagyong Ada.
Kini tungod sa wala’y hunong nga pag-ulan sukad pa ning mi-aging adlaw nga Martes, mao nga naa na usab sa blue alert ang City Disaster Risk Reduction and Management Department (CDRRMD) apil ang mga Barangay DRRM Offices.
Gipasabot ni Butuan City government spokesperson Michiko de Jesus, nga medyo na-ulahi ang ilang deklarasyon sa pagsuspende sa klase tungod kay ila pang gikonsidera ang weather outlook ilabina nga dili apil sa wind signal ang siyudad.
Sa pagkakaron, padayon nga gi-monitor sa mga teams sa City DRRMD ang mga barangay nga naa sa mga lugar nga delikado sa kalit nga baha ug pagdahili sa yuta, diin sa karon ang Brgy. Sto. Niño ug Los Angeles pa lamang ang adunay mi-apaw nga tubig-baha sa dalan.
Samtang subay sa gihimong pre-disaster risk assessment kagahapon sa mga hingtungdang departamento ug nga buhatan sa City Hall, nasuta nga andam na ang ilang mga assets higayong mugrabe ang daut nga panahon.
Andam na usab ang mga evacuation centers sa kabaranggayan susama sa ka-andam usab sa City Social Welfare and Development sa ilang mga food packs nga mahimo na usab nga ihatud ngadto sa manginahanglan unya niini.
