Ubay-ubay nga mga munisipyo sa Caraga Region, nagsuspende sa ilang klase ning adlawa

BUTUAN CITY – Mi-abot na sa 12 ka mga lungsod sa Caraga Region ang nagsuspende sa ilang klase karong adlawa tungod sa mga pag-ulan ug kusog nga huros sa hanging dala sa bagyong Ada.

Sigon ni Ronald Anthony Briol, tigpamaba sa Office of the Civil Defense kon OCD-Caraga, sa maong ihap, upat niini sa Dinagat Islands Province; pito sa Surigao del Norte ug usa sa lungsod sa Kitcharao, Agusan del Norte.

Samtang sa stranded nga mga pasahero usab as of kaganinang buntag, mi-abot na sa 706 sa tulo ka mga pantalan sa Dinagat Islands province, Nasipit Port ug sa Port of Surigao.

Nagpagawas na usab sila og general flood advisory ilabina sa mga lalawigan sa Agusan del Norte ug Sur, Surigao del Norte ug Sur ug dinhi sa dakbayan sa Butuan.