BUTUAN CITY – Dili matukib ang gibating kalipay ug pagpasalamat ni Albert Mejorada, class valedictorian sa Education Behind Bars program Class 2023-2024 sa Department of Education ubos sa Alternative Learning System sa oportunidad nga gihatag kanila aron makatapos sa junior high school human naka-undang og pila ka tuig.
Gibutyag ni Mejorda nga wala masayang ang pagkahimo niyang living spacer sa Agusan del Norte Provincial Jail tungod kay natutukan man niya og balik ang iyang pagtungha nga naputol dihang nakatungtong lang siya sa first year high school.
Sa eksklusibong pakighinabi sa Bombo Radyo Butuan, gibutyag niining dako ang iyang pagpasalamat sa ilang jail warden tungod sa paningkamot niining ma-umol sila og sakto ug ma-usab ang dagan sa ilang kinabuhi.
Gipasalamatan ni Mejorada ang iyang pamilya nga maoy kanunay nga nagdasig kaniya aron magtinarong sa iyang pagpuyo sulod sa maong prisuhan.
Gipasalamatan usab niya ang provincial government nga maoy naningkamot aron mapuslan ang ilang kinabuhi samtang nagserbisyo sa sala nga wala pa’y hukom.
