BUTUAN CITY – Gikumpirma ni Executive Secretary Lucas Bersamin nga si Criminal Investigation and Detection Group kon CIDG Chief PMaj. General Nicolas Torre III, ang musunod nga director general sa Philippine National Police kon PNP human nga siya ang gipili ni Pangulong Ferdinand Marcos Jr.
Sa iyang pag-atubang sa mga tigbalita, gipadayag ni Bersamin nga himuon ang turn-over of command sa bag-ong liderato sa nasudnong kapulisan karong Hunyo 2, adlaw’ng Lunes.
Madumdumang gipangunahan ni Torre ang pipila ka mga high-profile operations apil na ang pagpangita ug pagdakop kang Pastor Apollo Quiboloy sa Davao City ingon m an ang pagpadakop ug pagtugyan kang kanhi Pangulong Rodrigo Duterte ngadto sa International Criminal Court kon ICC sa The Hague, Netherlands.
Siya usab ang nagdumala kaniadto sa Quezon City Police District, Davao City Police Office, Western Samar Provincial Police Office, ingon man mga police stations sa Batangas City ug Mabalacat.
Ang iyang kasinatian sa intelligence ug field operations, apil na ang pagserbisyo sa kapulisan sa Central Luzon ug MIMAROPA kon Mindoro, Marinduque, Romblon ug Palawan, naghatag usab kaniya og expertise sa iyang gipangunahang dagkong operasyon.
Naggikan si Torre sa Koronadal City ug mi-graduate sa Koronadal National Comprehensive High School (KNCHS) niadtong tuig 1988.
