BUTUAN CITY – Sikat karon ang usa ka vlogger sa Guangdong, China human niya gipakita kung gi-unsa niya pag-extract ang 191.73 grams nga bulawan gikan sa mga daan nga SIM cards ug electronic waste.
Pinaagi sa komplikado nga chemical processes sama sa strong acid dissolution ug electrolytic reduction, iyang natunaw ang mga scrap aron makuha ang bulawan nga balor 120,000 yuan o gibana-banang ₱950,000.
Gitawag kini nga proseso nga “SIM alchemy”, ug daghang netizens ang nangandoy nga mosulay aron madato apan sigon sa mga eksperto, dili kini tinuod kung gikan lang sa ordinaryong SIM cards, tungod kay ang tinuod nga gold content sa usa ka SIM card kay gamay ra kaayo (0.47 mg) ug kinahanglan og hapit 400,000 ka piraso aron makuha ang kantidad nga gipakita.
Sa ulahi, gi-angkon sa vlogger nga gigamit niya ang mga gold-plated computer chips gikan sa electronic components sama sa sulod sa computer, cell phone ug servers.
Nagpasidaan usab ang mga awtoridad nga dili kini sundon sa balay tungod kay naggamit kini og makahilo ug delikadong kemikal nga makadaot sa panglawas.
