BUTUAN CITY – Gidepensahan ni Parokya ni Edgar frontman Chito Miranda ang iyang asawa, ang kanhe actress nga si Neri Naig human gi-aresto tungod sa kasong Estafa og kalapasan sa Securities Regulation Code.
Sa social media post , gibutyag ni Miranda nga walay giilad si Neri, wala kini nanglamang sa iyang isig katawo og wala siyay gikuha nga kwarta.
Dugang pa ni Chito nga gi-aresto ang iyang asawa nga wala man lay notice sa criminal complaint batuk kaniya diin wala kini nadawat nga sulat gikan sa prosecutor o bakaha subpoena bisan og dali lang matud-an ang ilang panimalay sa Alfonso, Cavite.
Giklaro ni Chito nga usa ka endorser lang ang iyang asawa ng gigamit ang nawong aron maka-agni og imbestor diin gikasuhan siya sa mga biktima apan na-dismissed na kini. Apan wala nagtoo ang magti-ayon nga dunay bag-ong kaso nga gipasaka batuk kaniya rasong wala niya nadepensahan ang iyang kaugalingon.
Sumala pa sa bana nga hilabihan kabootan ang iyang asawa nga gipa-priso nga wala man lay piyansa apan ang tinood nga nakasala, gawasnon pa.
Base sa taho, mihimo og manhunt operation ang Southern Police District pinaagi sa Sub-Station 10 Pasay City Police nga miresulta sa pagka-aresto kang alyas Erin, sa basement convention center sa usa ka mall sa Pasay City bandang alas 2:50 sa hapon niadtong Sabado, Nobyembre 23.
