BUTUAN CITY – Gihikay na sa Butuan City Police Station ang mga dokumento ug mga ebidensyang gamiton alang sa pagpasaka og kaso batuk sa tulo ka mga Pinoy og usa ka Chinese national nga nasapong duna’y kargang kahoy nga Argawood kon Lapnisan kansa endangered specie.
Naila ang mga nadakpang sila Benzar Ali Laguindad Mampa, 34-anyos, driver sa ilang gisakyang Avanza; mga Pinoy guide nga sila Ibrahim Acmad Sison ug Mundi Makalangan, 47-anyos pulos residente sa lungsod sa Gov. Generoso sa Davao Oriental og ang Intsik nga si Seng Kim Han, 30-anyos, minyo og taga-Fujian, China.
Sa eksklusibong pakighinabi sa Bombo Radyo Butuan, gipadayag ni station commander PCaptain Rodel Dorado nga nadakpan nila ang mga suspek sa gilusad nilang checkpoint sa Brgy. Ampayon pasado alas-10:30 kagabii.
Dili matud pa kaayo makasabot og pinulungang Ingles ang Intsik rason nga ilang gitu-uhang financier kini sa mga Pinoy alang sa pagpalusot sa Lapnisan.
Gika-ingong misiwil matud pa ang udlot sa maong kahoy nga mitimbang og 17-kilos og gibana-banang muhalin og 2.5-milyunes pesos.
Gidugang sa opisyal nga ang presyo sa matag-kilo sa maong kahoy mag-agad sa grade niini kondiin padayon pa ang ilang pagsuta kung asa gikan nila kini gikuha human gikabutyag nga gikan matud pa sila sa Surigao del Norte.
Human og pasaka nila og kaso, makig-alayon sila sa Bureau of Immigration aron masuta kung legal ang pagsulod dinhi sa nasud sa maong Chinese national.
