BUTUAN CITY – Ning apelar ang foreign Ministry sa China sa Pilipinas nga hunungon na ang provocation ingon man infringement ngadto sa ilahang nasod. Kini taliwala na sa panawagan sa Pilipinas nga pahawaon na nganhi sa nasod ang mga Chinese Diplomats tungod sa pagpakuyanap niini sa Disinformation nga kampanya niini kontra sa Pilipinas.
Sumala ni Chinese Foreign Ministry Spokesperson Lin Jian, ang maong lakang sa Pilipinas, nagpakita lamang matud pa nga nanalaw kini sa kamatuoran ingon man sa mga ebidensya nga ilahang gipresentar, dugang niini nga nagpakita lamang matud pa ang maong mga aksyon sa pagkadespirado sa Pilipinas.
Gikabutyag usab sa maong envoy nga undangon nalang sa Pilipinas ang paghimo og mga walay pulos nga mga lakang, kansa mas makapasamot pa hinoon sa nasinatian sa nasod ug dawaton nalang matud pa ang kamatuoran nga ilahang gilatid.
Kahinumduman nga nagpagawas ang Chinese Embassy sa Manila og gma transcripts o recordings nga naglambigit sa usa ka taas nga opisyal sa Pilipinas ingon man sa China, kansa hugot usab nga gipanghimakak ni National Security Adviser Eduardo Año.
