BUTUAN CITY – Mi-ani og managlahing reaksyon ang dry run sa checkpoint nga gipatuman sa local nga kagamhanan ning siyudad sa Butuan kagahapon didto sa Brgy. Antongalon alang sa pagbatuk sa COVID-19.
Kini tungod sa kahasol nga hatud niini ngadto sa mga pasahero gikan sa gipahunong nga mga sakyanan ilabina sa kataas sa oras nga paghulat tungod sa usa-usang pag-interview kanila.
Una nang gisugyot sa usa sa mga pasahero nga si Zenith Rojo sa eksklusibong pakighinabi sa Bombo Radyo Butuan, nga unta ang mga anaa sulod sa sakyanan dili na pana-ugon sa mga nag-man checkpoint alang sa interview tungod kay mawala na man ang gipatuman sa nasudnong kagamhanan nga social distancing tungod sa pagtapok na hinuon sa mga pasahero diha sa gimontar nga checkpoint.
Sugyot niini nga unta, mas daghanon ang mga tawong muhimo og checking aron mao na kini ang musaka sa mga sakyanan alang sa thermal scanning sa ingon dili masagol ang mga pasahero ngadto sa laing mga pasahero, sa panahong sila pakana-ugon.
Kini mas delikado tungod kay dili na matumbok kung dunay gisip-on o kaha gi-ubo nga mas daling makatakod.
