BUTUAN CITY – Grabeng kasubo ang gibati karon sa simbahang Katoliko ilabina sa kinatibuk-ang Italya human ang kalit nga pagkamatay ni Pope Francis kon Jorge Mario Bergoglio sa tinuod nga knabuhi kagahapon sa ala-1:35 sa hapon, oras sa Pilipinas.
Sa ekslusibong interview sa Bombo Radyo Butuan, gipadayag ni Reverend Fr. Coke Prieto, Bombo international correspondent sa Roma, nga klarong gipugos lang sa Santo Papa ang iyang kaugalingn nga makita sa publiko ang iyang presensya niadtong Easter Sunday mass kondiin gibasa ang iyang ‘Urbi et Orbi’ message ni Archbishop Diego Ravelli, ang Master of Pontifical Liturgical Celebrations.
Makita matud pa pila ka adlaw gikan karon ang mga kabag-uhang gitugon sa Santo Papa nga sundon sa Simbahan sa pagkamatay sa Santo Papa partikular na ang direktang pagbutang kaniya sa open casket inay nga ibutang una sa death bed.
Dugang pa ni Fr. Prieto, human gi-anunsyo sa Vatican ang pagkamatay ni Pope Francis, nagpagawas gilayon og notification si Archbishop Diego Ravelli nga si Most Reverend Eminence Cardinal Kevin Joseph Farrell na, kinsa maoy camerlengo sa Holy Roman Church, ang mag-preside sa pagdetermina sa pagpahiluna sa Holy Father diha sa lungon apil na ang pagdumala sa Simbahan aron hapsay ang tanan.
