BUTUAN CITY – Padayon pang gipangita sa mga membro sa investment scheme nga RD Flex Trading And ASIA Business Corporation nga nakabase sa Brgy. Poblacion sa Bayugan City, Agusan del Sur ang ilang chief executive officer.
Kini human gitu-uhang misibat kini bitbit ang milyunes pesos nga investment sa ilang mga membro samtang atua sa kauluhang Manila.
Sigon ni Rommel Montecalvo, kapitan sa Brgy. Mt. Olive, Bayugan City, gidala matud pa sa suspek nga si Ryan Flores ang pipila sa iyang mga membro didto sa Manila apan kalit lang nga gipangbiyaan og wala na nagpakita pa.
Dugang pa ni Kapitan Montecalvo, dihang gimando na ni Pangulong Rodrigo Duterte ang pagpasira sa mga investment schemes, gihangyo na niya si Flores nga i-uli na ang kwartang gi-invest sa iyang mga membro apan daghan matud pa kini og alibi.
Tungod kay dili na nila masubay pa ang lokasyon ni Flores, nagpatabang na siya uban ang ubang mga lideres sa maong investment group ngadto sa Public Attorney’s Office kon PAO alang sa himuong legal nga aksyon batuk sa responsable.
