BUTUAN CITY – Gipormalisa na ang pag-estalisar sa Center for Human Rights and Education kon CHRE dinhi sa Caraga Region human gipirmahan ang Memorandum of Agreement tali nila Caraga State University President Dr. Rolyn Daguil ug Commission on Human Rights (CHR) Commissioner Beda Epres.
Ang bag-ong center mag-operate ilawom sa Caraga Center for Peace and Development (CCPD) sa maong unibersidad sa ingon masiguro ang pag- integrate sa mga prinsipyo sa human rights ngadto sa educational frameworks subay sa nakalatid sa MOA.
Sa eksklusibong pakighinabi sa Bombo Radyo Butuan, gibutyag ni Edson Alejo, kini ang nag-una nilang programa uban sa Commission on Higher Education kon CHED aron mapalapdan ug masabtan sa mga estudyante ang tawhanong katungod sulod sa rehiyon.
Pinaagi matud pa sa maong center, ma-amoma ang kultura sa kalinaw ug pagrespeto sa tawhanong katungod.
Ang pag-establisar sa CHRE, usa matud pa ka proactive initiative isip tubag ngadto sa panawagan sa Commission on Human Rights alang sa pagpalapad pa sa kahibalo kalabot sa tawhanong katungod sa ingon ma-umol ang usa ka komunidad sa Caraga nga duna’y saktong kahibalo ug kasayuran kalabot sa atong isig katungod.
