BUTUAN CITY – Girekomenda karon sa Department of Environment and Natural Resources kon DENR-Caraga ang pagputol sa ‘Centennial Toog tree’ sa Brgy. Alegria lungsod sa San Francisco, lalawigan sa Agusan del Sur.
Kini tungod kay delikado na kini sa maong lugar ilabina sa mga tawong nanimuyo sa palibot niini.
Ang nasangpit nga kahoy usa sa pinakadako nga kahoy sa nasud og gihimong atraksyon sa maong lungsod kansa girekognisa usab sa Department of Tourism.
Sa eksklusibong pakighinabi sa Bombo Radyo Butuan, gipadayag ni Jerome Albia sa CENRO-Bunawan nga makigtagbo pa sila sa mga opisyal sa lungsod sa San Francisco og sa probinsyal nga panggamhanan sa Agusan del Sur.
Gibutyag sa opisyal nga base sa gihimong bio-mechanics and structural analysis sa ilang research department, nasuta nga ang punuan sa 50-metros nga gitas-on sa kahoy, nadugta na og duna usa’y ground cavity sa tunga sa punuan niini kansa delikado higayong matumba ilabina kung huyupon sa kusog nga huros sa hangin.
Gidugang pa sa opisyal nga kaniadto, gi-atiman pa sa tree surgeon ang cavity sa maong kahoy aron lang ma-save kini apan samtang milabay ang panahon, migrabe na ang maong cavity nga naghatag og delikado sa mga tawo sa palibot niini.
