BUTUAN CITY – Gisuspende og unom ka buwan sa Office of the Ombudsman si Cebu Governor Gwen Garcia may kalabutan sa iyang paghatag og special quarry permit ngadto sa usa ka construction company nga wala man lang pangitai og environmental compliance certificate (ECC) ug uban pang mga dokumento.
Sa upat ka palid nga suspension order nga gipagawas sa Office of the Ombudsman niadtong Abril 23, nakalatid nga isuspende nila nga wala’y bayad sulod sa unom ka buwan ang gobernador.
Apan giklaro sa Ombudsman nga ang maong suspension, posibleng matangtang ra bisan unsang orasa kung mahuman na ang imbestigasyon o kaha ibasura na ang kaso.
Bisan og suspendido, giklaro sa Commission on Election (COMELEC) nga magpabilin pa gihapon si Garcia isip kandidato sa Mayo 12 national and local elections.
Aminado ang COMELEC nga dili maka-apekto ang suspension sa iyang re-election bid.
