BUTUAN CITY – Nagmalampuson ang gihimong video conference ni CPP – NDF founder Jose Maria Sison ngadto sa mga tigbalita ning syudad sa Butuan kagahapong adlawa.
Nasayran nga gisugdan ang nasangpit nga video conference sa usa ka hotel ning syudad bandang alas- 3 ang takna sa hapon ug nahuman kini bandang alas – 6 ang takna sa gabie.
Usa sa mga giluwatang pamahayag sa nasangpit nga CPP founder mao ang ilang interes sa pagpadayon sa hisgutanang pangkalinaw tali sa ilang han-ay ug sa gobyerno sa nasud ilawom sa administrasyong Duterte.
Gikinahanglan matud pa kini karon hilabi na nga nagpadayon gihapon ang giyera tali sa duha ka panig.
Gidugang pa niini nga dili usab matud pa tinuod nga wala na magkahiusa pa ang walhong grupo.
Lakip usab sa mga gipahayag niini ang iyang pagsupak sa kasamtangang pamaagi karon sa gobyerno pakigbatuk sa ginadiling drugas ug ang isyu sa extra-judicial killings sa nasud.
Angayan matud pa nga ipatigbabaw gihapon ang rule of law ug dili pwede nga diha-diha na lamang mupatay. Nahisgutan usab niini ang isyu kabahin sa Martial Law dinhi sa Mindanao ug ang nahitabo karon didto sa syudad sa Marawi nga miresulta sa ubay-ubay nga nanghikling.
Matud pa nga kung buot huna-hunaon, daw mas grabe pa ang nabuhat sa mga sundalo nga pagguba sa maong syudad kung itandi sa teroristang Maute Group tungod sa ilang padayong pagbomba sa lugar. (Mon Aplaya)
