BUTUAN CITY – Mapasalamaton si Cabadbaran City Mayor Judy Chin Amante sa dakong pasidungog nga nadawat sa ilang siyudad human kini gi-ila sa Mayors for Good Governance kon M4GG isip usa sa mga 2025 Child-Friendly Local Governance Awardees.
Ang Mayors for Good Governance (M4GG) usa ka kwalisyon sa mga mayores sa Pilipinas nga gimugna niadtong tuig 2023 aron i-promote ang transparency, accountability, ug anticorruption reforms sa lokal nga kagamhanan.
Sa eksklusibong pakighinabi sa Bombo Radyo Butuan, gipadayag ni Mayor Amante nga ang maong award dili lamang personal nga kalampusan apan timaan sa panaghi-usa ug tinud-anay nga serbisyo publiko kansa gipakita sa tanang sektor sa ilang siyudad.
Misaad kining magpabilin ang commitment sa city government sa pagmintina sa ilang siyudad diin ang matag-bata motubo nga luwas, dunay giya, ug gihigugma, dayong dayeg sa suporta sa katawhan nga mao’y naghatag og kusog sa administrasyon.
