BUTUAN CITY – Patay ang usa ka lalaki samtang luwas na gikan sa delikadong kahimtang ang iyang hinigugma human sila nahulog sa habog nga pangpang padulong sa suba sa Sitio Tumipi, Brgy Puting Bato, Cabadbaran City kagahapon sa alas-dos sa hapon.
Naila ang namatay nga si Khem Richard Quimzon, hingkod ang pangidaron ug residente sa Brgy. Victory, lungsod sa Tubay, Agusan del Norte samtang ang hinigugma niining anaa pa sa ospital, nailang si Nazzel Constancia, 28-anyos ug residente sa Brgy Catugasan, Cabadbaran City.
Migawas sa inisyal nga imbestigasyon nga sakay ang mga biktima sa motorsiklo aron unta manguli na gikan nangaligo sa Tumipi Cold Spring.
Nasayrang kini na ang ikaduhang aksidente nga nalambigitan ni Quimzon sunod niadtong Hulyo 2023 kondiin na-coma siya niadtong tungura.
