BUTUAN CITY – Mipasaka na og cyberlibel complaints si Senadora Risa Hontiveros batuk sa mga indibidwal nga nagpaluyo sa nag-viral nga video nga nag-feature sa kanhi witness sa Senado nga nag-akusa kaniyang mipugos sa iyang testimoniya batuk sa mga Duterte ug sa gi-alegahang sex offender nga si Apollo Quiboloy.
Iyang gipasaka ang reklamo ngadto sa National Bureau of Investigation (NBI) batuk kang Michael Maurillo — nga maoy nag-akusa kaniya ingon man sa Pagtanggol Valiente, ang YouTube channel ug Facebook page nga nag-upload sa video ni Maurillo.
Sa nag-viral na karong video, gisaysay ni Maurillo nga gipugos siya ni Hontiveros pag-testify batuk nila kanhi Pangulong Rodrigo Duterte, Vice President Sara Duterte, ug Apollo Quiboloy, bugti sa kantidad nga P1 million.
Apan gipanghimakak kini ni Hontiveros dungan sa pagbutyag nga si Maurillo ang miduol sa iyang buhatan pila ka adlaw adiser gipagawas ang maong video dayong butyag nga gidagit matud pa siya ug gitanggong sa premises sa Kingdom of Jesus Christ.
Gi-imbestigahan na usab karon sa Philippine National Police ang kamatu-uran sa gika-ingong kidnapping.
Dugang ni Hontiveros, nasuta sa iyang mga abogado nga ang cyberlibel maoy pinakatukmang reklamo nga ipasaka batuk sa mga respondents.
Tumong sa iyang reklamo nga masuta kung kinsa ug unsa ang nagpaluyo sa duha ka mga videos ni Maurillo tungod kay hangtud karon, wala pa ma’y mi-angkon niini.
