BUTUAN CITY – Gideklarang pinaka-unang drug cleared municipality sa lalawigan sa Agusan Del Norte ang lungsod sa Carmen.
Kini ang gikumpirma ni Dindo Abellanosa, Regional Information Officer sa Philippine Drug Enforcement Agency kon PDEA-Caraga sa pakighinabi sa Bombo Radyo.
Sigon sa opisyal, ang maong lungsod dunay 8 ka mga barangay diin ang usa niini, nadeklarang drug cleared niadto pang Setyembre 6, 2017 samtang ang laing pito niini nadeklarang gawasnon na sa ginadiling drugas niadtong Agosto 15 ning tuiga.
Sumala pa ni Abellanosa, ang deklarasyon nagpasabot nga ang tanang barangay sa lungsod sa Carmen, napahigayonan ug drug clearing operation samtang nahikay nila ang mga papeles alang niini nga gisubmite ngadto sa national nga buhatan sa PDEA ug gibalik na sa PDEA-Caraga Office diin naghatag ug pagtugot nga kini edeklarar nag drug cleared.
Giklaro nalang sa opisyal nga bisan paman sa maong deklarasyon, magpadayon ang ilang montiring sa mga barangay diin dunay gibutang nga tawo aron motutuk niini.
Kagahapong adlawa nagpulong ang Regional Oversight Committee nga gilangkuban sa lokal nga kagamhanan, PDEA, Department of Health, Department of Interior and local Government kon DILG ug PNP. Sa maong higayon usab nadeklarang drug cleared ang 46 ka barangay sa Agusan Del Sur. (Rolan Janea)
