BUTUAN CITY – Nagpakitang-gilas ang Pinoy Olympic gymnast nga si Carlos Yulo sa duha niini ka pet events sa men’s gymnastics individual qualification sa 2024 Paris Olympics nga gihimo sa Bercy Arena.
Nanguna ang 24-anyos nga Filipino gymnast sa paborito niining floor exercise, diin naka tala kini og 14.766 puntos alang sa provisionary second spot sa maong event. Nangunguna sa floor exercise si Jake Jarman sa Great Britain, nga dunay 14.966 puntos.
Sulod usab si Yulo sa final round sa floor exercise ingon man sa gymnastics vault, diin anaa kini sa provisionary sixth spot sa naulahing event.
Sa kasamtangan, anaa pa si Yulo sa ikawalo nga pwesto sa all-around ranking diin 24 ka mga atleta ang mo abante sa finals. Kahibaloang naglisod si Yulo sa pommel horse diin duna lamang kini iskor nga 13.066, rings sa iskor nga 13.000, ingon man sa parallel bars sa iskor nga 14.533, ug horizontal bar, 13.466, diin dili na kini maka abante pa sa final rounds sa nasangpit nga mga apparatus.
