BUTUAN CITY – Positibo ang Pilipinong pari sa Rome, Italy nga si Rev. Fr. Joseph Capon nga si Cardinal Luis Antonio Tagle sa Pilipinas ang musunod nga Santo Papa human ningtaliwan si Pope Francis ning nakalabay’ng adlaw, subay na usab sa mga mensahe kaniya sa mga Italyanong pari.
Sumala ni Fr. Capon nga taga-Tubay, Agusan del Norte, inilog karon ang Pinoy nga si Cardinal Tagle sa maong posisyon sanglit sikat man usab kini sa Italya, ilabina nga halos pareho sila og batasan ni Pope Francis.
Sumala ni Fr. Capon, dako usab ang purohan nga botaran si Cardinal Tagle sa uban pang mga Cardinals tungod kay nasayod man sila nga ang Pilipinas ra ang bugtong nasod sa Asya nga 80% sa populasyon, mga katoliko.
Subay pa sa pari, mas maayo kung si Tagle ang mahimong Santo Papa ilabina nga daghang mga Pilipino ang atua sa Italy namuyo ug nanarbaho.
Aminado usab si Fr. Capon nga apektado gayud karon ang Simbahang Katoliko sa kamatayon sa Santo Papa ilabina nga daghan pang mga problema ang gi-atubang ang simbahan sama sa gyera sa Rusia tali sa Ukraine, Israel tali sa Hamas, ingon man sa mga wala napublisar nga mga giyera sa mga nasod sa Africa.
