BUTUAN CITY- Wala nagpaulahi ang ubang Caraganons sa paglambigit sa World Wide Fund kun WWF Philippines’ Earth Hour nga gihimo kagabie.
Nasayrang pipila ka mga panimalay, business establishments ug pampublikong lugar sa rehiyon ang misuporta sa kamapanyang pagprotektar sa kalibutan pinaagi sa pagpalong sa mga non-essential lights sama sa signages ug piling streetlights, suga sa mga monumento ug mga pampublikong lugar kansa nagsugod sa alas-8:30 hantod alas-9:30 kagabie.
Milambigit usab sa maong kalihukan ang ubang mga Local government Units (LGU), government agencies ingon man police stations sa rehiyon.
Sa pakighinabi sa Bombo Radyo Butuan , gipadayag ni Michiko De Jesus ang tigpamaba sa LGU-Butuan City nga gawas sa mga non-essential lights sa syudad mi-obserbar usab ang City Hall sa maong panawagan pinaagi sa pagpalong mga suga niini.
Sumala sa tigpamaba wala nay gihimong aktibidad ang kadumalahan sa maong kalihukan aron makalikay na usab sa posibling sa pagtakboy sa makatakod nga coronavirus disease 2019.
Madumdumang ang Earth Hour ang usa sa tinuig nga environmental movement nga gi-organisa sa World Wildlife Fund nga gilunsad adtong 2007 ug anaa sa 7,000 ka siyudad ug 180 ka nasud sa tibuok kalibutan ang misalmot niini.
Tumong niini nga makunhuran ang electrical consumption sa kalibutan aron mapaubos ang carbon footprint ug emissions nga magresulta sa climate change.
