BUTUAN CITY – Isip yanong kontribusyon ngadto sa pangkalibutanong pakigbatuk sa mga frontliners sa makamatay nga Coronavirus kon COVID-19, boluntaryong naghimo og mga face masks, face shields ingon man aerosol box ang mga magtutungha ug mga magtutudlo sa Caraga State University kon CSU.
Sigon ni CSU President Dr. Anthony Penaso, naghimo sila face shields gamit ang 3D printer nga iya sa Center for Renewable Energy, Automation and Fabrication Technologies kon CRAFT ug sa Fablab Caraga nga nakabase sa CSU Main Campus sa Brgy. Ampayon ning siyudad sa Butuan.
Samtang ang ilang gihimong nanocellulose films alang sa facial ug surgical masks gihimo pinaagi sa Material Science and Polymer Chemical Laboratory sa CSU Main Campusm Ang ilang mga faculty ug student volunteers usab sa Garments Technology program gamit ang 20 ka mga sewing machines ug autoclave machine kon sterilizer nga nakabase sa CSU-Cabadbaran City ang mihimo sa face masks.
Sa eksklusibong pakighinabi sa Bombo Radyo Butuan, gipadayag ni Dr. Penaso nga inisyatia kini sa ilang unibersidad aron bisan sa gamay man lang, matubag ang gi-atubang karong kakulangon sa mga personal protective equipments kon PPEs sa mga frontliners ilabina kadtong mga nadestino sa mga ospital ug mga checkpoints.
